Hriselna atana Zu Permit neih hi

Hmanni Chanchinbua thlalak pakhat an rawn tih lan Excise Office-a “Zu a awm lo tak tak” tih intar ka hmuh khan he thu hi ka rilruah a lang thar riau a, rawn au chhuahpui leh ngawt mai ila a tha awm e.

Zu chungchangah hi chuan thuthlukna felfai siam a har teh e, inhnialna tawp thei lo a ni reng dawn zawng a nih hi. Total Prohibition hmanna hmuna Zu permit neite hian doctor lehkha neiin an taksa tana thil tha a nih avangin zu inphalna pek an ni thin ngei mai. Hei hi anmahni doctorate ngeiin an sawi thin anga nitin zu tlem (Note:- Hei hian zu in tam a kawk lo, tlem te tak meuh meuh a ni) in hian lung natna, a bikin Ischemic Heart Disease- Lunga thisen zam zim emaw ping a veng thei nia an hmuhchhuah vang leh a vei tawhte tan pawh a zual tur veng thei ni awma a lan vanga chawh/ rawn an ni tlangpui. Kala lungte awm vanga Beer in tura tih an awm bawk maithei. Hemi natna pahnih tih lohah chuan zu in tura doctor ten an chawh ngai ka hre lem lo.

Zu in hi sual a ni em? Pastor pakhat chuan, “Nagaland-ah chuan kohhran thila committee kan kalin nilenga kan committee hnuah chaw kan han ei dawn a, zu tlem an rawn sem ta  diat diat mai. Kei chuan ka in duh lova, chutia chaw kan han ei kham chuan meizial ka tan a, ka han pak khu ta veng veng mai chu mak ti tak hian, "Kristian ni siin meizial te i zuk a, a va mak ve thil sual lian tak a ni asin an ti ta mai a,” tiin min hrilh. Missionary pakhat pawhin “Arunachal-ah chuan a ruka mei zuk a ngai a, patling pui hian mei kan zu ru duk duk reng mai, mahse zu chu eng vakah an ngai leh miah si lo,” tiin min hrilh. Eng pawh chu ni se khawi Society mah hian Zu heh (zu ngawlvei) hi chu an ngaisang hauh lo tih chu tu pawhin kan hre vek chuan ka ring. Hetah hian zu in hi sual a nih leh nih loh lam chu sawi vak ka tum pawh a ni lo, mimal ngaihdanah dah mai ila a tha ang.

Hriselna a thlen reng em? Doctorte (Manson, J. E., et al. The primary prevention of myocardial infarction. The New England Journal of Medicine, 1992, 326(21), 1406-1416.) sawi danin zu tlem nitin (wine no khat/ beer bur khat/ rum emaw whisky peg 1) in thin hian Heart Attack, Stroke, BP sâng, Zunthlum leh Alzheimers disease a veng thei niin an sawi/ ngai a. Hei hian zu in nasa erawh a huam lo tih hriat tur a ni. Hei bakah pawh hian research tam takin zu in ngai lo aiin tlem in thinten lung natna an nei tlem zawk tih an hmuchhuak. Amaherawhchu, heng study-te pawh hian kimlohna (limitations) tam tak a nei tih hriat tur. Tun hnaia mithiamten an zirchian (study) pakhat (Circulation. 1996; 94:3023-3025.) chuan, hmaa an lo study tawh tam tak chu an study method a rawn question ta tlat mai. Entir nan, Saint Pauls High School chuan Matric result tha tak an neih ziah avangin Mizo High School aiin school thaah kan ngai nghal mai a, Saint Pauls High School zirtina tha zawk leh zirtirtute thiam zawk angah a ngaih theih awm e. Hei hi thil dik tak ngei a ni em tih erawh kan hre chuang lo. Kum khat emaw kum thum chhung naupang zawng zawng inthleng ta vek sela an zirtir dan ngaiin kal reng bawk sela chumi hnua an result atang chauhin a hriat chian theih chauh dawn a ni.

Hetiang chiah hian heng study-ah hian an mihring zir-a-te chu kawng engkima an in-an hnuah, an zu in dan chiah danglam ni ta sela an thil zira an thil hmuh chhuah chu za-ah za a pawm theih chauh ang. Amaherawhchu, heng study-ah te hian zu in ngai lo leh zu tlem in thinte chu an lo inang lo nasa mai a. Zu tlem in thinte chu an hlawh a sâng zawk fe a, thiamna lamah pawh an sâng zawk a, hriselna lam pawh an ngai pawimawh zawk bawk. Zu in ngai loho hian Junk food ei an uar zawk tih an hmu chhuak lehzel a. Hetiang a nih chuan, kum 5 tal zu in ngai loho hian zu tlem in ve ta thin sela, tin zu in thinte hi kum 5 tal zu in lovin awm ve ta bawk sela, chumi hnua an result hmuh chhuah chu rin tlak a ni tawh chauh a ni. Zu in ngai lo, zu in tura in tih leh zu in thin kum 5 tal nghei tura hmin turin khawvel awm chhung chuan eng study mah hian a ti thei dawn lo. Chuti a nih chuan zu tlem in thin hian hriselna a thlen tak tak nge thlen tak tak lo tih chu khawvel awm chhung chuan kan hrechiang ngai dawn lo a nih chu.

Nitin zu tlem in hi a har em? Harsa e, zu tlem in thin (moderate drinkers) zaa pariat 8% hian zu ngawl an vei chho ngei ngei an tih chu! Zu heh (zu ngawlvei) hian natna tam tak a thlen tih chu sawi ngai lo pawhin kan hre vek awm e. Chu mai bakah chhungkaw tan leh khawtlang tan mi hnawksak an ni tih pawh kan pha awm love. Mizorama mi cheng zawng zawng hi nuaih sawm angah chhut ta ila, hriselna atana tha tiin zu tlem in theuh tur ti ta bawk ila a tlem berah mi sing 8 chuan zu ngawl an vei chho ngei ngei dawn tihna a ni a, a tlem hran lo hle mai! Hei vang chauh pawh hian zu tlem in thin tura infuih chu thil tha chu a ni hauh lo a nih chu.

Zu-in Lung a ven dan Zu tlem in hnua zu-in lung natna a ven theih dan ni awm ang hrang hrang an han ngaihtuah a. HDL cholesterol tisangin LDL cholesterol a tihniam a, BP a tihniam ni-ah ngaih a ni thin (hengte hi Lung tan a tha). Amaherawhchu, zu no hnih khat han in mai hian hengte hi a ti danglam vak hran lo a ni tih hmuhchhuah a ni leh ta zel a. Italian-ho khuan Red Wine an in nasa a, an ti a nungin Lung natna an nei tlem hle tih hriat a nih hnuin Red Wine hi zirchian a ni ta a. Grape rah kawra tel, 'resveratrol' hi lung hian a lo ngeih hle a ni tih an hre ta a, wine a in emaw grape a ei emaw a dang chuang lo. Hei hian mithiamte chu research tam tak neih tirin vitamin muma telh turin an siam chhuak ta a. Tun hnaiha phei chuan Aizawl khawpui ngeiah pawh Resveratrol telna vitamin mum chu lei tur a awm ta teuh mai (damdawi promote vang ni lovin - Resvita Capsule-ah hian a tel a ni).

Zu Permit a ngai lo chuti chuan kan thupuiah chuan lut leh ta ila. Total Prohibition ka thlawp emaw thlawp lo lam ni lovin, kan hmang law law a nih chuan heng permit neite pawh hi engnge an permit neih chhan chiah endik a va tul ve. Lung lam that loh vanga permit nei an nih chuan an permit cancel sak a, resveratrol telna vitamin ei tura rawn mai a va tha awm em. Kala lungte awm chungchang kha kan sawi tam vak lova, hei pawh hi a awmzia takah chuan zu hian zun a ti tam a, chuvanga chawh chu an ni mai. Chu pawh beer bak an chawh ngai lo. Tui in tam, nitin tui litre 2-3 tal in thin hian lungte mai ni lo, zunkawng hnai a veng em em a ni tih hriat a tha khawp mai. Kal lam damdawi, zu aia tha tam tak a awm bawk.

Ka sawi tum tak chu hriselna atana zu permit inpek hi a tul hauh lo tih a nih chu. Ka tawng an huat thu ni lo sela, tuna permit neiho pawh hian a nih dan tur ang hian an in chiah em tih hi tunge finfiah tawh le? Zu hriselna atana an in dawn a nih chuan ni khatah wine no 1/ beer bur khat/ whisky or rum peg 1 aia tam an in tur a ni lo. Hetiang hian an in chiah em tih enfiah hi tu mawh nge ni ta ang le? Total prohibition kan hmang ta sa sa, hriselna atan pawh zu aia tha damdawi a awm reng laia zu kher inchawh a, permit in pek ai chuan, tumah hian permit nei lo law law ila, an pe a nih leh mi zawng zawng hi pek vek law law ni mai se a va tha awm ve. Dam leh hrisel duh theuh kan ni lo'm ni?

- Dr.P.C.Lalthlamuana - MD Medicine Specialist Presbyterian Hospital, Durtlang