“A hmingah chuan Maka, Buaina hnar, Zu thupna, Drugs thupna, tleirawl leh rawltharte, nula tlangvalte bakah nutling patlingte nun hruai khawlotu an la ti dawn si a” han ti mai ila chu sawrkar pawi emaw, Champhai leh Hnahlan tlang dunga thawhrim rah sengtute pawi emaw kan sawi reu reu palh ang tih a hlauhawm sia. Chuvangin, a hming atan “Zawlaidi” an tih tak Grape wine chungchang hi ka han zeldin thubawl kual mai mai teh ang.
Hmanlai thawnthuah chuan Zawlaidi avanga inngaizawng ta leh Zawlaidi avanga buaina tawkte chanchin kan hre nual a. Chung zingah chuan Pangzawl nula, khualkai khawpa hmeltha Chawngvungi leh tlang thanpui tham khawpa hmelchhia Sawngkhara te chanchin pawh kan hria a. Khati khawpa hmeltha Chawngpuii, hmelchhe hmingthang Sawnga zuna uai tirtu kha “Zawlaidi” ngei a nih kha.
Hmanlai thawnthuah chuan Zawlaidi avanga inngaizawng ta leh Zawlaidi avanga buaina tawkte chanchin kan hre nual a. Chung zingah chuan Pangzawl nula, khualkai khawpa hmeltha Chawngvungi leh tlang thanpui tham khawpa hmelchhia Sawngkhara te chanchin pawh kan hria a. Khati khawpa hmeltha Chawngpuii, hmelchhe hmingthang Sawnga zuna uai tirtu kha “Zawlaidi” ngei a nih kha.
Awle, Hnahlan leh Champhai tlangdunga kut hnthawktute chuan hlemhletna leh kuttlinglo ni lovin, an thawhrim rah dik tak chu dik leh fair takin an seng tan ta a, a man pawh cheng tam an rut mek a ni. Tunah phei chuan a sawrkhur dik taka sawr chhuakin hun reiloteah Zoram dung leh vangah zunleng ngah tak tur Zawlaidi chuan 'romantic' tak maiin min rawn zem dawn ta chu a nia, tunge ding zo ang le?
Thangkhat lian teh meuh zu khap burna danin a phuar mek, Zoram thalai, nu leh pa, tleirawl leh rawlthar te, hmeichheho nun tuihalin, “Engemaw ei châk deuh ka nei a, ka hre si lo” an tih ang deuhva, engemaw tih châka nun tuihal nei mekte hian, chu kan tuihal rukna ti reh tur leh tuihal rukna nei lo te pawhin chhin (test) duhna neiin, suala ngaih loh a nihna nen, kan chhin (test) sup sup ang a. Kan hna thawhna leh Kohhran Upa in leh Biak-in compound thlenga seng luh a ni ngei ang. Sawrkarin suala a chhiar loh avangin a rawn ngampa hle turah ka ngai a. Nula tlangval Kohhran leh NGO`s-a inhmang tak takte pawh he zawlaidi zun hian a phuar dawn chiang a, rawlthar leh tleirawl nun tuihal leh thil thar tem leh chhin duhna nei tlatte phei chu he thil hian ava chiah zawp nasa dawn em tih hi ka zeldin thubawl a ni.
Sawrkar berin a phalrai laia Kohhran leh NGO tena lo ralpui phiar ngawt lah chu a tih chi dawn si lo. A ruihhlo pai (alcohol) han chhut hian Whiskey leh Rum Peg khat a tui kan pawlh hnu, in nuam tawk tluk vela tak hi a nih hmel a. Chutiang a nih chuan Zawlaidi um khat hi patling ruihna tham zan a ni dawn tihna a nih chu! Chaw eikhawm nikhuaah te Krismas leh Kumthar ruai thehnaah te zu rui leh Zawlaidi rui a thliar theih tawh dawn si lo a, kan va chhangchhe duh dawn tak em!
Damdawi rui thin hovin bihruk nan, zu rui thin hovin inphen nan, damdawi leh zu inngai loten suala ngai lovin nun tih zangkhai nan he Zawlaidi hi kan hmang ang. Chu nun zauthauna chuan mipat hmeichhiatnaah min hnuk lut ang a, vawiina kan nula tlangval nun thianghlim tak takte nun pawh hi tlangval hmelchhe hmingthang Sawngkhara zuna Chawngvungi a uai zawr hnup ang mai khan he ram lo thleng tur, kan pa Davida ram ni lo Zawlaidi ram hian min la pal tuidul hle in ka ring tlat a. Tleirawl leh rawltharte nun phei chu, hnuhma thup thiam lo an la nih ang hian, a zual zawpui vailenhlo tih ang mai a chang thei dawn a ni. Naupang hleikang chho mekte nunah thleng hian hlet a chhuah ngei ang.
Chuvang chuan he Zawlaidi ram lo thleng tur kan nghah khawchhak tlangdung atanga lo luangthla tur hi a control-na dan fel leh uluk taka duan a ni em ka hre lo. Kei chuan Champhai Tlangsama Pu Lalzawna leh a pawlte hlauh em em, Khawchhak lungpui lo lum tur ai khan ka hlau zawk daih asin.
Chuvang chuan he Zawlaidi ram lo thleng tur kan nghah khawchhak tlangdung atanga lo luangthla tur hi a control-na dan fel leh uluk taka duan a ni em ka hre lo. Kei chuan Champhai Tlangsama Pu Lalzawna leh a pawlte hlauh em em, Khawchhak lungpui lo lum tur ai khan ka hlau zawk daih asin.
Kan sawrkar thuneitute hian ngun takin chhut sela, thunun lohva zalen taka Zawlaidi phalrai ai chuan thununna leh khuahkhirhna dan fel tak siama Permit neia zu zawrh hi a fuh zawk ka ring tlat.
Kan thalai nun thianghlim tak tak te, nupa kawpchawi tha tak takte nun tichhia a nupa tang then leh fahrah nun thlenga siam thei a nih rualin, a dawt leh (next step) phei chu hri a zawnga hri hlauhawm ber AIDS thlenga min um luttu tur Zawlaidi hi kan ram tahna ruama hnuk lut thei a ni tih hriain, a zun zamin min phuar buai hma hian a invenna dai i theu lawk ang u. Chuti lo chuan he Zawlaidi hian kan rin aia thukah bu a khuar palh hlauh dah ang e. Thawhrim rah sengtute erawh ka lawmpuiin chhuanawm ka ti a, an sawrkhur pawh wine tha miin liam zawih zawih mawlh rawh se.
Post a Comment